I Congreso MODELO

Xa se pode descargar o cartel do congreso desde a pestaña “Programa” da web do congreso

O vindeiro luns 28 de febreiro ás 12:00 horas, terá lugar no reitorado da Universidade da Coruña a sinatura do convenio de colaboración entre dita universidade e máis a asociación Afiprodel. En novembro do ano pasado a UDC recoñeceu 2 créditos para o Congreso MODELO que Afiprodel está organizando en colaboración có Grupo de Investigación Persoa – Ambiente de Ciencias da Educación da UDC.

O acto contará coa presenza do reitor da universidade, José María Barja Pérez, e mais o profesor e membro do comité científico do congreso, Ricardo Garcia Mira. Por Afiprodel asistirán a presidenta, Dolores Pena, e a secretaria da entidade, María Jiménez.

No acto procederase tamén á presentación en A Coruña do Congreso MODELO á comunidade universitaria.

O pasado 11 de febreiro, o reitor da USC, Juan Jose Casares Long,  recoñeceulle 1 crédito de libre configuración ao Congreso MODELO. O responsable académico universitario para estes efectos será Manuel González López, profesor da Facultade de Ciencias Económicas e Empresariais. Os créditos poderanse imputar aos alumnos que cursen estudos conducentes ás Licenciaturas, Diplomaturas, Enxeñarías Técnicas e Mestres que se imparten nesta universidade. Os e as estudantes universitarios que asistan a este evento poderán acreditar a realización da actividade mediante o certificado que se lle entregue na secretaría do congreso.

Este recoñecemento súmase aos 2 créditos recoñecidos en novembro pasado pola Universidade da Coruña.

O martes 18 de febreiro, representantes da AFIPRODEL, asociación Finisterrae de profesionais do desenvolvemento local, mantiveron unha xuntanza con Andrés Hermida Trastoy, Director Xeral de Promoción do Emprego da Consellería de  Traballo e Benestar para solicitar o apoio desta Consellería na organización do Congreso de desenvolvemento MODELO.

Dolores Pena, presidenta, María Jiménez, secretaria e Norberto Pais, socio de Afiprodel presentaron ao Director Xeral de Promoción do Emprego o Congreso de desenvolvemento “Marco de Oportunidades para o Desenvolvemento Local” que se vai celebrar os días 25 e 26 de marzo en Vimianzo e 1 e 2 de abril de 2011 en Corcubión. Nesta xuntanza se tratou das posibilidades de colaboración e apoio neste evento da Consellería de Traballo.

Andrés Hermida Tratoy transmitiu aos representantes de Afiprodel o apoio da Conselleira e da Dirección Xeral Promoción do Emprego a esta iniciativa xurdida de compoñentes da rede de axentes de emprego e desenvolvemento local da Xunta de Galicia e que se dirixe aos profesionais do desenvolvemento local e a estudantes universitarios. Valorou moi positivamente o programa e o alto nivel e prestixio dos relatores e relatoras do Congreso. Comprometeu a participación da Consellería no cofinanciamento deste congreso, que xa conta cunha subvención da Deputación da Coruña).

Este Congreso, que se presentara oficialmente no Concello de Carnota na primeira semana de febreiro, conta coa colaboración de entidades e asociacións galegas e da Costa da Morte, a UPD Coordina Local II do IGAPE-BIC Galicia. O evento está coorganizado pola Universidade da Coruña que recoñeceulle 2 créditos de libre configuración. Nestes días estase a esperar polos organizadores do Congreso a confirmación do recoñecemento de 1 crédito pola Universidade de Santiago de Compostela.

Ser escaparate de iniciativas e experiencias e ofrecer un marco para o intercambio e o encontro son obxectivos deste congreso de desenvolvemento local e do espazo de Comunicacións que ofrece este evento e que está a disposición das entidades, persoas, empresas e administración que desexen divulgar e compartir os seus proxectos, programas, investigación ou actuacións.